WILLEMSTAD- 11 di desèmber 2025 – Resientemente, na Miami, Florida a tuma lugá e seremonia di ‘Caribbean Media Exchange (CMEx) Leadership Awards’. E aña aki un total di 15 persona a risibí e rekonosementu prestigioso aki di kual Direktor di Ofisina di Turismo di Kòrsou (CTB), Muryad de Bruin, ta unu di nan. E rekonosementu a keda entregá pa Caribbean Media Exchange, Inc. un organisashon nonprofit ku su mishon ta entre otro pa sostené i desaroyá e abilidat di media, gobièrnu, industria di biahe i turismo i komunidatnan pa rekonosé e importansia di turismo den desaroyo sostenibel. E seremonia di e aña aki a honra personanan ku pa medio di nan liderazgo ta sigui kontribuí na turismo, kultura i desaroyo den Karibe.
Sr. de Bruin a risibí e rekonosementu aki na nòmber di koleganan di CTB i tur persona ku ta laborá den e industria di turismo i hospitalidat. E esfuerso kolektivo, ta loke ta sòru ku Kòrsou di forma konsistente ta ofresé un eksperensia eksepshonal na turistanan, lagando nan sera konosí ku Kòrsou su playanan bunita, kultura vibrante, tradishonnan kulinario i hendenan amabel.
