WILLEMSTAD- 2 di desèmber 2025 – Dia 2 di desèmber, Kòrsou a selebrá yegada di dos buelo inougural di e aerolínea LATAM, e airline group di mas grandi den Latino Amérika. Promé a baha e buelo di LATAM for di Bogotá, Colombia i mas despues durante dia e buelo for di Lima, Perú kual ta un destinashon nobo pa Kòrsou. E buelonan for di Bogotá lo keda efektuá 3 biaha pa siman riba djamars, djaweps i djadumingu. E ruta Lima – Kòrsou tambe lo ta 3 biaha pa siman, riba djamars, djabièrnè i djadumingu. E ruta for di Perú, ta kuadra ku Kòrsou su metanan stratégiko di habri mas konekshon di biahe for di Sur Amérika hasiendo Kòrsou mas aksesibel pa e region aki. Alabes e konekshonnan nobo di LATAM ta nifiká mas opshon di biahe pa nos pueblo lokal.
LATAM ta un partner importante pa Kòrsou kual ta kontribuí pa sigui posishoná Kòrsou komo un destinashon turístiko prominente. Biaheronan for di e region di Sur Amérika semper ta buska destinashonnan outéntiko kaminda nan por sera konosí di aserka ku e habitantenan su kultura, historia i herensia. Esaki ta netamente loke Kòrsou tin pa ofresé na kada bishitante. Durante e seremonianan a hiba palabra, Minister di Desaroyo Ekonómiko, sr. Roderick Middelhof, sr. Gonzalo Ramirez, Director of Operations North America na LATAM, sr. Ricardo Hernández, CEO di Curaçao Airport Partners i di Curaçao Airport Holding, sra. Priscilla Duin – Circkens, Chief Strategy Officer i sr. Julian Diaz de Pool, Commercial Manager. Mas aleu, Minister Middelhof i Ofisina di Turismo di Kòrsou representá pa sr. Muryad de Bruin, Direktor i sr. Hugo Clarinda, Direktor Athunto huntu ku demas partnernan a hasi entrega di plakatnan konmemorativo na sr. Gonzalo Ramirez (LATAM) komo muestra di apresio pa yegada di e buelonan inougural. Tur dos plakat ta ilustrá bistanan bunita di Kòrsou su sentro di siudat.
Gobièrnu di Kòrsou, Ofisina di Turismo di Kòrsou (CTB), Curaçao Airport Partners (CAP), Curaçao Airport Holding (CAH) i Curaçao Hospitality & Tourism Association (CHATA) ta felisitá LATAM ku nan rutanan nobo, Lima – Kòrsou i Bogotá – Kòrsou !
