WILLEMSTAD – 26 di novèmber 2025 – Resientemente 9 guia turístiko a risibí nan sertifikado komo parti di un kurso intensivo di ‘Tourist Guide Trainer’ ofresé pa Ofisina di Turismo di Kòrsou (CTB) den estrecho kolaborashon ku World Federation of Tourist Guide Associations (WFTGA). Guianan turístiko tin un ròl importante den ofresé informashon korekto na nos turistanan. Informashon di entre otro historia, herensia i sitionan importante na Kòrsou. E kurso di 2 siman a inkluí un kombinashon di diferente training práktiko pa refreská i fortalesé e téknikanan pa duna guia. Tambe a para ketu na e komponentenan di ‘Train the Trainer’ kual a pone énfasis riba e abilidatnan rekerí pa desaroyá training i di duna coaching. E programa a terminá ku un eksámen na final. Tur e partisipantenan ku a terminá e kurso, a keda sertifiká komo Trainer Nashonal bou di e struktura di WFTGA. Durante un seremonia ameno, Direktor di CTB, Muryad de Bruin huntu ku Minister di Enseñansa, Siensia, Kultura i Deporte, Sithree van Heydoorn a hasi entrega di sertifikado na e partisipantenan.
E kurso a keda duná pa un fasilitadó internashonal di training di WFTGA, kual a biaha for di Noruega pa asina ofresé e kurso na e partisipantenan di Kòrsou. E kurso di 2 siman, a inkluí tópikonan manera: konsientisashon kultural, planifikashon di itinerario, maneho di krísis, diseñá i manehá kursonan di guia turístiko, fasilitá seshonnan interaktivo, e poder di feedback i abilidatnan pa duna coaching. Tambe a praktiká e téknikanan di walking tour, site tour i tour riba un vehíkulo.
E konosementu atkerí ta ekipá kada unu ku e abilidatnan nesesario pa por train i sertifiká futuro guianan turístiko komo parti di un struktura lokalmente i internashonalmente rekonosé.
