WILLEMSTAD – 21 di òktober 2025 – Resientemente Ofisina di Turismo di Kòrsou (CTB) huntu ku partnernan di sektor privá a partisipá na Feria Internacional de Turismo (FIT) na Buenos Aires, Argentina. CTB a partisipá ku e meta pa konektá ku konsumidónan, mayoristanan i agentenan di biahe pa asina mustra Kòrsou su produkto turístiko diverso i úniko. Durante e dos promé dianan, e partisipantenan na e feria a inkluí públiko general, agentenan di biahe i e último dos dianan tabata dediká na eksklusivamente profeshonalnan den turismo.
FIT 2025 a konta ku partisipashon di aproksimadamente 140 mil bishitante di kual 40 mil ta profeshonalnan di Argentina i di diferente pais den region Cono Sur. E aña aki e stènt di Kòrsou tabata unu kolorido ku énfasis riba Kòrsou su konosido brùg di ponton, Handelskade i paisahenan espektakular di nos playanan. Durante e kuater dianan di e feria, e tim di Kòrsou a presentá paketenan atraktivo diseñá pa inspirá bishitantenan pa skohe Kòrsou pa nan próksimo vakashon. E tim a tene tambe diferente reunion stratégiko ku mayoristanan manera Aero, Travel Services, Ola i Almundo i tambe ku agensianan di biahe online entre otro booking.com i Almundo. Mas aleu, e tim a tene diferente entrevista ku medianan dirigí riba negoshi manera Ladevi, Diario de Turismo, Report, Rumbo Trade i Mensajero Turistico, komo tambe ku medianan manera entre otro Telfe Neuquen i La terraza de Rosario.
Partisipashon na ferianan di turismo manera FIT ta brinda un oportunidat balioso pa konektá ku tantu potensial turistanan komo profeshonalnan den turismo. Partnernan ku a forma parti di e tim di Kòrsou ta: Rumba Tours, Corendon Mangrove Beach Resort, The Rif at Mangrove Beach Corendon Curaçao All-Inclusive, Fiesta Tours, Hyatt Inclusive Collection, Hibiscus Beach House, Curaçao Marriott Beach Resort, Curaçao Vacation Tours, Avila Beach Hotel & TUI Blue Curaçao i Kunuku Aqua Resort.
