WILLEMSTAD – 22 di sèptèmber 2025 –Ofisina di Turismo di Kòrsou (CTB) huntu ku 3 operador di tour na Alemania; DERTOUR Group, alltours Flugreisen i Sunwave Singlereisen & Gruppenreisen, resientemente a organisá un roadshow di Kòrsou na diferente siudat na Alemania. E aerolíneanan KLM i Corendon tambe a forma parti di e roadshow. Meta di e roadshow tabata pa alsa e konsientisashon riba loke Kòrsou tin di ofresé komo destinashon turístiko. E roadshow a konta ku partisipashon di 110 agente di biahe repartí riba e siudatnan Düsseldorf i Wiesbaden. Na Hamburg i Munich un total di 40 biahero a partisipá.
Kada evento a enserá un presentashon di Kòrsou di 30 minüt na enkargo di representante di CTB, siguí pa un update di e produkto ku Kòrsou ta ofresé i un presentashon di e portafolio di hotèlnan di Kòrsou presentá dor di e operadornan di tour. KLM i Corendon a elaborá riba kon fásil ta pa yega Kòrsou for di Alemania via di nan otro konekshonnan. Durante di e seshonnan, e agentenan di biahe tabatin e oportunidat pa purba un tiki di Kòrsou, ku kòktelnan trahá ku nos famoso Blue Curaçao. Tambe nan por a gana premio di estadia di spònser pa Curaçao Marriott Beach Resort, Kunuku Aqua Resort, Mangrove Beach Corendon Curaçao i The Rif at Mangrove Beach Corendon Curaçao.
Pa e eventonan na Hamburg i Munich, e operador di tour Sunwave Singlereisen & Gruppenreisen a introdusí un konsepto spesial dirigí riba solteronan i biaheronan ku ta biaha nan só. Hopi di nan ta bishitando Kòrsou tur aña di nobo na luna di òktober i novèmber for di aña 2014. E meta di e evento tabata pa presentá Kòrsou i duna e partisipantenan e oportunidat pa hasi konekshonnan nobo i topa personanan ku kisas nan por biaha huntu kuné un próksimo biaha.
CTB ta gradisí e operadornan di tour, aerolíneanan i partnernan lokal pa nan apoyo i kontribushon kual a sòru pa éksito di e roadshow.
