WILLEMSTAD – 13 di ougùstùs 2025 – Ofisina di Turismo di Kòrsou (CTB) ta raporta ku 66.956 turista di estadia a bishitá nos pais na yüli 2025, representando 14% kresementu kompará ku yüli 2024. Yüli a bira un luna importante pa industria di turismo di Kòrsou. E kresementu registrá ta demostrá Kòrsou su atrakshon kontinuo komo un destinashon ideal pa temporada di ‘zomer’, kaminda bishitantenan ta keda enkantá ku e bon wer, kultura vibrante i playanan bunita.
Sur Amérika a registrá un kresementu di 46%, Nort Amérika 18%, Karibe a krese ku 11% miéntras Europa a konosé un bahada di 3%. No opstante esaki, Europa ta keda e merkado for di kua Kòrsou ta risibí mas tantu turista registrando un total di 27.427 turista. Informashon kolektá for di e karchinan di Imigrashon ta mustra ku turistanan a keda un averahe di 9.2 anochi riba nos pais na luna di yüli.
Prestashon tòp 3 merkadonan na luna di yüli 2025:
Hulanda: Kòrsou a risibí 23.769 turista for di Hulanda, un bahada di 5% kompará ku e kantidat di 24.976 turista risibí na yüli 2024. Mayoria turista hulandes (61%) a opta pa un otro opshon di akomodashon ku no ta resort, miéntras 39% a skohe pa keda na un resort hotel. Turistanan hulandes a keda un promedio di 14.1 anochi durante nan bishita.
Estádos Unídos: Estádos Unídos ta keda un merkado importante, ku un oumento di 20% den kantidat di turista di estadia yegando na un total di 16.735 turista kompará ku 13.981 risibí na yüli 2024. Mayoria turista merikano (68%) a skohe pa resort hotels, miéntras 32% a opta pa otro opshon di akomodashon. Turistanan prosedente di Estádos Unídos a keda un promedio di 5.9 anochi riba Kòrsou.
Colombia: Turistanan prosedente di Colombia a subi ku68% na yüli 2025, yegando na un total di 5.090 turista kompará ku 3.033 risibí na yüli 2024. Bishitantenan prosedente di Colombia a pasa un promedio di 5.3 anochi na Kòrsou, kaminda 55% a skohe pa keda na un resort hotel.
Puntonan ku a resaltá di yanüari te ku yüli 2025
Kòrsou su industria di turismo a mustra un prestashon stabil den e promé 7 lunanan di 2025, sostené pa esfuersonan stratégiko pa oumentá visibilidat den e merkadonan prinsipal i e kolaborashon kontinuo ku hotèlnan i aerolíneanan. Di yanüari pa yüli 2025, Kòrsou a risibí 1 mion bishitante inkluyendo 466.694 turista di estadia, 27.603 day trippers i508.693 turista krusero, esaki ta reflehá un kresementu di 6% kompará ku e mesun periodo na aña pasá. Miéntras e tendensia positivo aki ta kontinuá, nos enfoke ta pa sigurá eksperensianan signifikante pa nos bishitantenan miéntras ta preservá e karakter úniko i aspektonan atraktivo di nos destinashon.
