WILLEMSTAD- 14 di yüli 2025 – Dia 14 di yüli a tuma lugá selebrashon di e buelo inougural di Z Air saliendo Kòrsou rumbo pa St, Maarten. Z Air lo ofresé 3 buelo pa siman riba djaluna, djárason i djabièrnè ku un Embraer 140. Di e manera aki e aerolínea Z Air ta sigui ekspandé su skema di buelo brindando e posibilidat pa mas persona bineksperensiá e tesoronan di nos dushi isla. Di otro banda, e ruta nobo lo nifiká tambe mas opshon di biahe pa komunidat di Kòrsou, tantu pa esnan ku ta biaha pa vakashon òf pa hasi negoshi.
Pa selebrá e buelo inougural a tene un seremonia ameno kaminda a hiba palabra na nòmber di Gobièrnu di Kòrsou, sra. Kimberly Lew-Jen-Tai, Minister di Maneho di Gobernashon, Planifikashon i Servisio Públiko, sr. Rene Winkel, CEO di Z Air, sr. Michael Hoehenberger, COO di Curaçao Airport Partners i sr. Julian Diaz de Pool, Commercial Manager di Curaçao Airport Holding.
Mas aleu, Minister Lew-Jen-Tai, Minister Shalten Hato i sr. Hugo Clarinda, direktor athunto di Ofisina di Turismo di Kòrsou huntu ku representantenan di Curaçao Airport Holding i Ministerio di Tráfiko, Transporte i Planifikashon Urbano a hasi entrega di un plakat konmemorativo na sr. Winkel (Z Air), ilustrando brùg Emma i Handelskade parti anochi. Despues di e seremonia ofisial, e promé buelo a sali rumbo pa St. Maarten bou di zonido di sirena di brantspùit di CUR.
Gobièrnu di Kòrsou, Ofisina di Turismo di Kòrsou, Curaçao Airport Partners, Curaçao Airport Holding i Curaçao Hospitality & Tourism Association ta felisitá Z Air ku nan ruta nobo, Kòrsou – St. Maarten!
