WILLEMSTAD – 14 di yüli 2025 – Ofisina di Turismo di Kòrsou (CTB) ta raporta ku 57.412 turista di estadia a bishitá nos pais na yüni 2025, representando 15% kresementu kompará ku yüni 2024.E kresementu stabil aki ta mustra ku mas turista ta skohe Kòrsou, tambe durante e lunanan konsiderá komo e temporada slou di turismo.
Tur region for di kua nos ta risibí turista a kontribuí na e kresementu. Karibe a registrá e kresementu di mas fuerte ku 25%, sigui pa Sur Amérika ku un kresementu di 20%, Nort Amérika ku 15% i Europa a registrá un kresementu di 8%. Europa i Nort Amérika ta sigui ta e regionnan for di kua nos pais a risibí mas tantu turista den sifranan apsoluto, ku 19.554 i 17.997 turista respektivamente. Informashon kolektá for di e karchinan di Imigrashon ta mustra ku turistanan a keda un averahe di 7.7 anochi riba nos pais na luna di yüni.
Prestashon tòp 3 merkadonan na luna di yüni 2025:
Estádos Unídos: Estádos Unídos ta keda un merkado fuerte, ku un oumento di 15% den kantidat di turista di estadia kompará ku yüni 2024. Kòrsou a risibí un total di 17.119 turista na yüni 2025 kual a posishoná e merkado di Estádos Unídos komo e merkado for di kua Kòrsou a risibí mayoria turista na luna di yüni. Mayoria turista merikano (68%) a skohe pa resort hotels, miéntras 32% a opta pa otro opshon di akomodashon. Turistanan prosedente di Estádos Unídos a keda un promedio di 6 anochi riba Kòrsou.
Hulanda: Kòrsou a risibí 16.390 turista for di Hulanda, un kresementu di 6% kompará ku e kantidat di 15.422 turista risibí na yüni 2024. Mayoria turista hulandes (55%) a opta pa un otro opshon di akomodashon ku no ta resort, miéntras 45% a skohe pa keda na un resort hotel. Turistanan hulandes a keda un promedio di 11.7 anochi durante nan bishita.
Colombia: Turistanan prosedente di Colombia a subi ku9% na yüni 2025, yegando na un total di 5.770 turista kompará ku 5.290 risibí na yüni 2024. Bishitantenan prosedente di Colombia a pasa un promedio di 5.4 anochi na Kòrsou, kaminda 59% a skohe pa keda na un resort hotel.
Puntonan ku a resaltá di yanüari te ku yüni 2025
E promé 6 lunanan di 2025 a mustra un prestashon impreshonante. Di yanüari pa yüni 2025, Kòrsou a risibí 898.059 turista inkluyendo 399.738 turista di estadia, 24.516 day trippers i473.805 turista krusero, esaki ta reflehá un kresementu di 5% kompará ku e mesun periodo na 2024. E kantidat di turista di estadia risibí a registrá un kresementu di 15% i CTB ta antisipá un kresementu kontinuo yegando posiblemente na e meta stipulá pa e aña aki kual ta un total di 765 mil turista di estadia.
