WILLEMSTAD – 3 di yüli 2025 – Resientemente Ofisina di Turismo di Kòrsou (CTB) huntu ku representantenan di Jacky Circuit i Atlas Classic Curaçao Sports Festival a bishitá Aruba pa invitá nos hermana isla pa bin disfrutá di tur e aktividatnan ku Kòrsou tin prepará pa e di dos mitar di 2025.
Na komienso di aña, ya CTB kompañá pa diferente partner a tene un media-tour na Aruba pa ekstendé un invitashon pa bin eksperensiá e eventonan ku lo a tuma lugá na Kòrsou durante e promé mitar di aña i awor a toka turno pa promové e eventonan ku lo tuma lugá durante e di dos mitar di 2025. Ta trata aki di entre otro eventonan musikal, kultural i deportivo kaminda e bishitante for di Aruba por bin gosa huntu ku nos hendenan lokal. Aruba semper ta reakshoná positivamente riba aktividatnan ku ta tuma lugá aki na Kòrsou p’esei semper CTB ta promové esakinan intensivamente den e merkado aki.
Durante e media-tour a lansa tambe un kampaña na 2 radio emisora den kual lo bai rifa 2 pakete ku ta inkluí pasashi, estadia i entrada pa CNSJF pa un total di 4 persona di Aruba por bin disfrutá di CNSJF aki na Kòrsou. Algun di e eventonan ku a keda promové ta entre otro Kaya Kaya Festival, Curaçao North Sea Jazz Festival (CNSJF), Jacky Circuit – Playground i Atlas Classic Curaçao Sports Festival.
CTB ta gradisí e medionan di komunikashon na Aruba pa nan espasio; 24ora.com, Canal 90 FM Aruba’s Superstation, Hot 103.5 FM Aruba, Magic FM Aruba, Power 101.7 FM, TeleAruba, Top 95 FM i X FM Aruba.
