LATAM Airlines Colombia lo introdusí 3 buelo pa siman
WILLEMSTAD- 18 di yüni 2025 – Ofisina di Turismo di Kòrsou (CTB) den kolaborashon ku Curaçao Airport Partners (CAP), Curaçao Hospitality & Tourism Association (CHATA) i Curaçao Airport Holding (CAH) ta anunsiá ku e aerolínea LATAM Airlines Colombia lo inisiá un buelo direkto entre Bogotá, Colombia i Kòrsou entrante 2 di desèmber 2025. E buelo lo keda operá 3 biaha pa siman riba tur djamars, djaweps i djadumingu durante e temporada haltu. E buelonan lo keda ehekutá ku un Airbus A320. E partnership nobo ku LATAM Airlines Colombia lo brinda e posibilidat pa Kòrsou risibí mas turista for di Colombia kual ta un merkado importante pa Kòrsou. Na mes momentu e konekshon nobo aki lo nifiká mas opshon di biahe pa pueblo di Kòrsou, tantu pa esnan ku ta biaha pa vakashon òf pa hasi negoshi.
E skema di buelo ta di e siguiente manera:
El Dorado International Airport (BOG) – Curaçao International Airport (CUR)
Salida: 10:10 Yegada: 13:20
Curaçao International Airport (CUR) – El Dorado International Airport (BOG)
Salida: 14:40 Yegada: 15:55
Awor, mas turista kolombiano por bin eksperensiá Kòrsou su produkto turístiko riku. For di un variedat amplio di akomodashon te na diferente atrakshon turístiko, playanan bunita, deportenan akuátiko, kultura vibrante, herensia úniko, entre otro Kòrsou su sentro di siudat Willemstad ku ta riba lista di herensia mundial di UNESCO, variedat di eventonan i mas ku tur kos e kaluroso hospitalidat di e habitantenan di Kòrsou.
