WILLEMSTAD- 16 di mei 2025 – Resientemente Minister di Desaroyo Ekonómiko, sr. Charles Cooper a hasi desvelo di e bòrchi ku ta duna un impreshon visual di e siguiente fase di e desaroyo na e área públiko na Zakitó. E fase aki lo konsentrá riba drecha e playa chikí na e entrada prinsipal di Koredor, traha un playa riba tera na haltura di e edifisio di Sundance i amplia e fasilidatnan rekreativo na Koredor. Na e momentunan aki ta finalisando e plannan i ta hasiendo e konsultanan i estudionan nesesario pa asina por prepará ehekushon di e proyekto.
E proyekto ta finansiá for di fondonan fasilitá pa Ministerio di Desaroyo Ekonómiko (MEO). E trabounan di konstrukshon lo keda supervisá pa Heren2 Caribbean miéntras kordinashon di e proyekto ta den man di Ofisina di Turismo di Kòrsou (CTB). E área públiko na Zakitó, ta un área popular espesialmente pa lokalnan i turistanan ku ta hasi deporte i tambe pa enkuentronan sosial. E trabounan ku lo bai tuma lugá komo parti di e siguiente fase lo sigui mehora e balor rekreativo di e área, ofresiendo tantu lokalnan komo turistanan un eksperensia aún mas agradabel.
