WILLEMSTAD – 14 di mei 2025 – Ofisina di Turismo di Kòrsou (CTB) ta kontentu pa anunsiá un kresementu kontinuo den kantidat di turista di estadia durante e lunanan di temporada haltu di turismo. Luna di aprel, Kòrsou a risibí 68.188 turista di estadia kual ta representá un kresementu di 18% kompará ku e mesun luna na 2024, registrando 10.438 turista di estadia adishonal. E kresementu kontinuo aki ta mustra e demanda konsistente durante e último luna di e temporada haltu di turismo.
Tur region a mustra un prestashon positivo den luna di aprel. Sur Amérika a registrá un kresementu di 32%, Karibe 28%, Nort Amérika 24% i Europa 8%. Den sifranan apsoluto, Nort Amérika i Europa ta sigui ta e regionnan for di kua nos pais a risibí mas tantu turista, tur dos region a registrá riba 20 mil turista. For di Europa, 27.775 turista a keda risibí miéntras for di Nort Amérika nos a risibí 21.897 turista. Informashon kolektá for di e karchinan di Imigrashon ta mustra ku turistanan a keda un averahe di 8.1 anochi riba nos pais na luna di aprel.
Prestashon tòp 3 merkadonan na luna di aprel 2025:
Hulanda: Kòrsou a risibí 22.154 turista for di Hulanda, e sifra aki ta komparabel na e kantidat di 22.198 turista risibí na aprel 2024. Mayoria turista hulandes (59%) a opta pa un otro opshon di akomodashon ku no ta resort, miéntras 41% a skohe pa keda na un resort hotel. Turistanan hulandes a keda un promedio di 11.4 anochi durante nan bishita. Un kantidat di 33% di turistanan hulandes ku a bishitá Kòrsou na aprel ta entre 45 i 64 aña.
Estádos Unídos: Estádos Unídos ta keda un merkado importante pa Kòrsou, ku un oumento di 26% yegando na un total di 18.004 turista kompará ku 14.303 risibí na aprel 2024. Mayoria turista merikano (68%) a skohe pa resort hotels, miéntras 32% a opta pa otro opshon di akomodashon. Turistanan prosedente di Estádos Unídos a keda un promedio di 5.9 anochi riba Kòrsou, miéntras mayoria tabata prosedente di New York (15%) sigui pa Florida (7%), North Carolina (5%) i Georgia, New Jersey, Pennsylvania i Texas (4% kada unu).
Canada: Turistanan prosedente di Canada a subi ku14% na aprel 2025, yegando na un total di 3.893 turista kompará ku 3.409 risibí na aprel 2024. Bishitantenan prosedente di Canada a pasa un promedio di 7.6 anochi na Kòrsou, kaminda 56% a skohe pa keda na un resort hotel. Mayoria turista for di Canada ku a bishitá Kòrsou den luna di aprel ta prosedente di Ontario (48%) i Quebec (29%).
Puntonan ku a resaltá di yanüari te ku aprel 2025
Kòrsou su industria di turismo a mustra un prestashon fuerte den e promé kuater lunanan di 2025, sostené pa esfuersonan stratégiko pa mantené visibilidat den e merkadonan prinsipal. E enfoke di Kòrsou riba diversifikashon di merkadonan i e asistensia di e aerolíneanan prinsipal ku ta sirbi Kòrsou, a kontribuí na resultadonan stabil. Di yanüari pa aprel 2025, Kòrsou a risibí 680.992 turista inkluyendo 283.555 turista di estadia, 16.244 day trippers i381.193 turista krusero.
